Útfarir og greftranir

Jesús sagði: ,,Ég er upprisan og lífið. Sá sem trúir á mig, mun lifa þótt hann deyi. Og hver sem trúir á mig, mun aldrei að eilífu deyja. Jh.11.26.

Hinsta kveðja

Þegar einhver úr söfnuðinum fellur frá fer fram útfararathöfn, yfirleitt í kirkju, og að henni lokinni greftrun í kirkjugarði. Undanfari útfararinnar er kistulagning, sem er bænastund með aðstandendum þegar hinn látni hefur verið lagður í kistu og áður en henni er lokað. Einnig er algengt að prestur leiði stutta bænastund með fjölskyldu og ástvinum við andlátið eða skömmu síðar, til huggunar og styrktar á erfiðri stundu.

Útför í kirkju er hátíðleg kveðjuathöfn þar sem minning hins látna er heiðruð og aðstandendur fá tækifæri til að kveðja í virðingu og kærleika. Athöfnin felur yfirleitt í sér bænir, ritningarlestur, tónlist og minningarorð sem veita huggun og von. Útförin er mikilvæg stund samveru þar sem fjölskylda og vinir koma saman til að minnast lífs og starfs hins látna.

Að lokinni útfararathöfn fer fram greftrun. Við hefðbundna kistugreftrun er kistan borin til grafar og lögð til hinstu hvílu í kirkjugarði. Ef um bálför er að ræða fer útförin fram með kistu viðstadda, en greftrun duftkers fer fram síðar í kirkjugarði, ýmist í nánum hópi aðstandenda eða við sérstaka athöfn. Báðar leiðir eru virðingarfullar og veita fjölskyldu og vinum tækifæri til að kveðja og minnast ástvinar.

Minningarathöfn er samverustund þar sem fjölskylda og vinir koma saman til að minnast látins ástvinar og heiðra minningu hans. Slík athöfn er ekki eiginleg útför en getur falist í bæn, tónlist, ritningalestri, minningarorðum eða öðrum þáttum sem veita huggun og skapa rými til íhugunar. Minningarathöfn getur farið fram þegar útför hefur þegar átt sér stað eða þegar ekki er unnt að halda hefðbundna útfararathöfn.

Í kristinni útfararathöfn sameinast sorg og von. Við kveðjum ástvini okkar í trausti á kærleika Guðs og með þeirri von sem kristin trú boðar um upprisu og eilíft líf. Kirkjugarðurinn er helgur staður þar sem minning, þakklæti og von mætast.

Hvert get ég leitað?

Prestar veita allar nánari upplýsingar og veita aðstendendum þá aðstoð sem þarf við undirbúning útfarar. Útfararstofur veita jafnframt mjög góða þjónustu í þessum efnum.

Velkomið er að hafa samband við presta Esjuprestakalls. Þau veita ráðgjöf og sálgæslu í öllum aðstæðum lífsins jafnt gleði og sorg.