Æskulýðsfélagið ósoM fór í skemmtilega og eftirminnilega ferð í Vatnaskóg í nóvember þar sem mikið líf og fjör einkenndi helgina.

ÓsoM keppti bæði í hæfileikakeppni og spurningakeppni og stóðu þátttakendur sig með prýði. Keppnin var jafnframt frábært tækifæri fyrir krakkana til að láta ljós sitt skína og prófa nýja hluti.

Á mótinu var fjölbreytt dagskrá í boði. Má þar nefna ball, kvöldvökur og notalegar stundir í heitum pottum, sem slógu rækilega í gegn hjá þátttakendum. Þá hélt Hugarafl einnig fræðsluerindi sem vöktu umræður og gáfu ungmennunum dýrmæta innsýn í mikilvægi andlegrar heilsu, sjálfseflingar og samkenndar.

Stemningin í Vatnaskógi var einstaklega góð alla helgina og ríkti mikill samhugur meðal þátttakenda. ÓsoM var til fyrirmyndar í framkomu, samvinnu og þátttöku og sýndi bæði ábyrgð og jákvætt hugarfar í öllu sem þau tóku sér fyrir hendur.

Ferðin í Vatnaskóg var því bæði skemmtileg og lærdómsrík og mun án efa sitja lengi í minni þeirra sem tóku þátt. Slíkar ferðir styrkja ekki aðeins félagsstarfið heldur efla líka vináttu, sjálfstraust og samstöðu innan hópsins, og ósoM sýndi svo sannarlega að þar fer öflugur og samheldinn hópur.

Mynd tekin af KFUM.is